1Pe 1 | AAK | STEP | Pitaonɨ —Nionɨ Jisasɨ Kiraisoyá wáí̵ wurɨmeiarɨŋá wonɨrɨnɨ. Nionɨ payí̵ rɨna ámá mɨ dáŋí̵yí̵ne'nɨŋí̵ imónɨgí̵áyí̵ne' nánɨ —Seyí̵ne' e'í̵ nɨmiamoro pɨropenɨsí̵ xegí̵ yoí̵ Podasɨyɨ rɨnɨŋí̵yo ŋwearo Garesia rɨnɨŋí̵yo ŋwearo Kapadosa rɨnɨŋí̵yo ŋwearo Esia rɨnɨŋí̵yo ŋwearo Bitinia rɨnɨŋí̵yo ŋwearo egí̵áyí̵ne'rɨnɨ. Seyí̵ne' nánɨ payí̵ rɨna nɨrɨrɨ eaarɨŋɨnɨ. Seyí̵ne' Jisasɨ Kiraiso rɨŋí̵pimɨ xɨxenɨ xí̵dɨpí̵rɨ nánɨ ero o ragí̵ yoxáí̵pámɨ nɨperí̵ná puŋí̵pɨ tí̵nɨ igí̵ánɨŋí̵ nɨseaeámoirí̵ná segí̵ í̵wí̵ yarɨgí̵ápɨ yokwarɨmí̵ seainɨ nánɨ erɨ ení̵a nánɨ ápo Gorɨxo xegí̵ kwíyí̵pɨ seaaínɨŋí̵yo dánɨ nionɨyáyí̵ imóní̵í̵rɨxɨnɨrɨ xegí̵ nɨjí̵á xámɨ xwí̵á rɨrí sɨnɨ mimónɨŋáná imónɨŋí̵pɨ tí̵nɨ xɨxenɨ í̵á yɨyamɨxɨmí̵ seaiŋí̵yí̵ne'rɨnɨ. “O wá ayá wí seaiwianɨrɨ nɨwayɨrónɨro ŋweapí̵rɨ nánɨ ayá wí seaiirɨ e'wɨnɨgɨnɨ.” nimónarɨnɨ.

1 Peter 1

1 Pitaonɨ —Nionɨ Jisasɨ Kiraisoyá wáí̵ wurɨmeiarɨŋá wonɨrɨnɨ. Nionɨ payí̵ rɨna ámá mɨ dáŋí̵yí̵ne'nɨŋí̵ imónɨgí̵áyí̵ne' nánɨ —Seyí̵ne' e'í̵ nɨmiamoro pɨropenɨsí̵ xegí̵ yoí̵ Podasɨyɨ rɨnɨŋí̵yo ŋwearo Garesia rɨnɨŋí̵yo ŋwearo Kapadosa rɨnɨŋí̵yo ŋwearo Esia rɨnɨŋí̵yo ŋwearo Bitinia rɨnɨŋí̵yo ŋwearo egí̵áyí̵ne'rɨnɨ. Seyí̵ne' nánɨ payí̵ rɨna nɨrɨrɨ eaarɨŋɨnɨ. Seyí̵ne' Jisasɨ Kiraiso rɨŋí̵pimɨ xɨxenɨ xí̵dɨpí̵rɨ nánɨ ero o ragí̵ yoxáí̵pámɨ nɨperí̵ná puŋí̵pɨ tí̵nɨ igí̵ánɨŋí̵ nɨseaeámoirí̵ná segí̵ í̵wí̵ yarɨgí̵ápɨ yokwarɨmí̵ seainɨ nánɨ erɨ ení̵a nánɨ ápo Gorɨxo xegí̵ kwíyí̵pɨ seaaínɨŋí̵yo dánɨ nionɨyáyí̵ imóní̵í̵rɨxɨnɨrɨ xegí̵ nɨjí̵á xámɨ xwí̵á rɨrí sɨnɨ mimónɨŋáná imónɨŋí̵pɨ tí̵nɨ xɨxenɨ í̵á yɨyamɨxɨmí̵ seaiŋí̵yí̵ne'rɨnɨ. “O wá ayá wí seaiwianɨrɨ nɨwayɨrónɨro ŋweapí̵rɨ nánɨ ayá wí seaiirɨ e'wɨnɨgɨnɨ.” nimónarɨnɨ.

“Xeanɨŋí̵ seaímeaarɨŋagɨ aí Gorɨxo yeáyí̵ neayimɨxemeaní̵árɨnɨ.” urɨŋí̵ nánɨrɨnɨ.

3 Nene Gorɨxomɨ —O negí̵ Ámɨná Jisasɨ Kiraisomɨ xano imónɨrɨ Ŋwí̵áo imónɨrɨ eŋorɨnɨ. Omɨ yayí̵ owianeyɨ. Ayí̵ rɨpɨ nánɨrɨnɨ. Nene Jisasɨ Kiraiso xwárɨpáyo dánɨ wiápí̵nɨmeaŋí̵ eŋagɨ nánɨ wenɨŋí̵ nerɨ ŋweaarɨŋwápɨ “Nepa xɨxenɨ neaímeaní̵árɨnɨ.” yaiwianí̵wá nánɨ Gorɨxo xegí̵ wá xwapí̵ neaumɨxɨŋí̵yo dánɨ ámɨ sɨŋí̵ neaxɨrɨŋene'nɨŋí̵ eweaŋwárɨnɨ. 4 “Nene nɨneaímeaní̵árɨnɨ.” nɨyaiwirɨ wenɨŋí̵ nerɨ ŋweaarɨŋwápɨ, ayí̵ Gorɨxo “Naŋí̵ e e nɨseaiimí̵árɨnɨ.” rɨŋí̵pɨ apɨrɨnɨ. Apɨ wí urí̵ epaxí̵ mimóní̵ erɨ sɨyikwí̵ míní̵ naŋí̵nɨ epaxí̵ erɨ anɨpá bɨ mimónɨpaxí̵ erɨ eŋí̵pɨrɨnɨ. Aŋí̵namɨ Gorɨxo seyí̵ne' nánɨ seameŋweaiarɨŋí̵pɨrɨnɨ. 5 Gorɨxo sí̵á yoparí̵yi imónáná yeáyí̵ nɨseayimɨxemearí̵ná sɨpearí̵mí̵ seainí̵ápɨ piaumɨmí̵ iní̵wɨnɨgɨnɨrɨ seyí̵ne' dɨŋí̵ wɨkwí̵roarɨŋagí̵a nánɨ xegí̵ eŋí̵ sɨxí̵ eánɨŋí̵pɨ tí̵nɨ awí seameŋweaŋí̵yí̵ne' eŋagɨ nánɨ rarɨŋɨnɨ. 6 Xeanɨŋí̵ agwɨ ríná Gorɨxo xe owímeanɨrɨ wimónɨŋí̵ bɨ onɨmiápɨ nánɨ xɨxegí̵nɨ seaímeaarɨŋí̵pɨ nɨmu'ropaxí̵ mimónɨŋagɨ nánɨ dɨŋí̵ rí̵á seaxearɨŋí̵rɨnɨ. E nerɨ aiwɨ sí̵á yoparí̵yimɨ Gorɨxo seaiiní̵ápɨ nánɨ seyí̵ne' yayí̵ seáyɨmɨ dánɨ seainarɨŋí̵rɨnɨ. 7 Jisasɨ Kiraiso seyí̵ne' mimóní̵ dɨŋí̵ mɨwɨkwí̵ró nepa xwioxí̵yo dánɨ xí̵omɨ dɨŋí̵ wɨkwí̵roarɨŋagí̵a nɨseanɨrɨ nánɨ xewanɨŋo piaumɨmí̵ nɨseainɨrí̵ná seyí̵ne' yayí̵ seamerɨ seáyɨ e seamí̵eyoarɨ we' íkwiaŋwí̵yo seaŋwɨrárɨrɨ emí̵ánɨrɨ nánɨ agwɨ ríná xeanɨŋí̵ xɨxegí̵nɨ seaímeaarɨnɨ. Ewayí̵ xwɨyí̵á sí̵ŋá gorí̵ nánɨ rɨnɨŋí̵ rɨpɨ nánɨ dɨŋí̵ mópoyɨ. Ámá sí̵ŋá gorí̵ —Gorí̵ ayí̵ urí̵ epaxí̵ imónɨŋí̵pɨrɨnɨ. Sí̵ŋá apɨ tí̵ŋí̵ bɨ nɨmearo aga sí̵ŋápɨ rí̵á nɨnɨrɨ gorí̵ nápɨ, siŋí̵ inɨŋí̵pɨnɨ xegí̵pɨ owenɨrɨ ámɨ ámɨ rí̵á ikeaárarɨgí̵ápa segí̵ dɨŋí̵ wɨkwí̵roarɨgí̵ápɨ —Apɨ gorí̵ tí̵nɨ xɨxenɨ imónɨŋí̵pɨmanɨ. Seáyɨ e imónɨŋí̵pɨrɨnɨ. Apɨ enɨ axí̵pɨ xwioxí̵yo dánɨ rí̵a nɨkwí̵roarɨŋoɨnɨrɨ gorí̵ rí̵ánɨŋí̵ ikeaárarɨgí̵ápa xeanɨŋí̵ enɨ axí̵pɨ e seaímearɨŋí̵rɨnɨ. 8 Seyí̵ne' Jisasomɨ sí̵mɨmaŋí̵yo sɨŋwí̵ mɨwɨnɨpa egí̵áyí̵ne' nimónɨro aiwɨ dɨŋí̵ sɨxí̵ uyarɨgí̵árɨnɨ. Agwɨ ríná enɨ sɨŋwí̵ mɨwɨnɨpaxí̵ nɨseaimónɨrɨ aiwɨ dɨŋí̵ nɨwɨkwí̵roro nánɨ aga yayí̵ xwɨyí̵á tí̵nɨ rɨpaxí̵ mimónɨŋí̵pɨ seáyɨmɨ dánɨ nɨseainɨrɨ nánɨ íkwí̵eyoánarɨŋoɨ. 9 E nerí̵ná Jisasomɨ dɨŋí̵ wɨkwí̵roarɨŋagí̵a nánɨ seaimónɨní̵ápɨ —Gorɨxo yeáyí̵ seayimɨxemeaní̵ápɨ nánɨ rarɨŋɨnɨ. Apɨ rɨxa seaímeaarɨŋagɨ nánɨ yayí̵ seainarɨnɨ. 10 Gorɨxo apɨ e nerí̵ná yeáyí̵ seayimɨxemeaní̵ápɨ nánɨ eŋíná wí̵á rókiamoagí̵á “Gorɨxo wá nɨseawianɨrí̵ná e seaiiní̵árɨnɨ.” rɨgí̵áwa dɨŋí̵ “Gorɨxo arɨge nerɨ ení̵a nánɨ rí̵a rarɨnɨ?” nɨyaiwiro anɨŋí̵ miní̵ yarimágí̵ niga bagí̵árɨnɨ. 11 Kwíyí̵ Kiraisoyápɨ áwaŋí̵ ínɨmɨ dánɨ urɨnɨŋí̵ rɨpɨ, “Xámɨ xeanɨŋí̵ ámá Gorɨxo yeáyí̵ seayimɨxemeaní̵a nánɨ urowáre'napɨní̵omɨ nɨwímeámáná eŋáná rí̵we'ná ámɨ seáyɨ e xegí̵ bɨ imónɨŋí̵pɨ wímeaní̵árɨnɨ.” Wí̵á rókiamoagí̵áwamɨ áwaŋí̵ kwíyí̵yo dánɨ e urɨnɨŋí̵pɨ nánɨ awa dɨŋí̵ nɨmoróná “Yeáyí̵ neayimɨxemeaní̵a nánɨ urowáre'napɨní̵o gíná bɨní̵árí̵anɨ? Omɨ wímeaní̵ápɨ arɨge nimónɨrɨ wímeaní̵árí̵anɨ?” nɨyaiwiro yarimágí̵ niga bagí̵árɨnɨ. 12 E nero aí Gorɨxo awa re oyaiwípoyɨnɨrɨ, “None wí̵á urókiamoarɨŋwápɨ negí̵ tí̵ŋí̵ ríná imónɨní̵ápɨmanɨ. Ámá noneyá rí̵wí̵yo ŋweagí̵áyí̵ tí̵ŋíná imónɨní̵ápɨrɨnɨ.” oyaiwípoyɨnɨrɨ sɨŋánɨ waropárí̵ wiŋɨnigɨnɨ. O nene nánɨ neaiiŋí̵pɨ, ayí̵ xwɨyí̵á yayí̵ seainɨpaxí̵ agwɨ ríná wáí̵ rarɨgí̵áwa kwíyí̵ aŋí̵namɨ dánɨ wí̵re'napɨŋí̵pimɨ dánɨ wáí̵ searɨmegí̵ápɨrɨnɨ. Aŋí̵najowa enɨ aga nɨjí̵á oimónaneyɨnɨro nɨwimónɨro egí̵ápɨrɨnɨ.

“Íkwɨráí̵nánɨŋí̵ imóní̵í̵rɨxɨnɨ.” urɨŋí̵ nánɨrɨnɨ.

13 Gorɨxo e neaiiŋí̵ eŋagɨ nánɨ segí̵ dɨŋí̵ nɨseaɨkwearɨpeárɨnɨgɨnɨrɨ píránɨŋí̵ pí̵rí̵ wiaíkímí̵ ninɨro sɨŋwí̵ tí̵nɨ nero re nɨyaiwiro, “Jisasɨ Kiraiso xewanɨŋo piaumɨmí̵ ináná Gorɨxo wá nɨneawianɨrí̵ná neaiiŋí̵pɨ yoparí̵pɨ sɨpearí̵mí̵ nɨneairɨ yeáyí̵ neayimɨxemeáwɨnɨgɨnɨ.” nɨyaiwiro dɨŋí̵ nɨwikwí̵moro ŋweáí̵rɨxɨnɨ. 14 Seyí̵ne' niaíwí̵ arí̵á yí̵mɨgí̵ yarɨgí̵áyí̵nɨŋí̵ nimónɨro xwɨyí̵á yayí̵ seainɨpaxí̵pɨ sɨnɨ mají̵á nimónɨrí̵ná “Pí pí nionɨ í̵eapá ninarɨŋí̵pɨ sa oemɨnɨ.” nɨyaiwiro yagí̵ápɨ sɨnɨ xe oneaímeanɨnɨrɨ mɨseaimónɨpa e'í̵rɨxɨnɨ. 15 E mepa nero sɨyikwí̵ bɨ míní̵ íkwɨráí̵nánɨŋí̵ imónɨŋo —O seyí̵ne' xí̵o xegí̵yí̵ imóní̵í̵rɨxɨnɨrɨ we'yo í̵á seaumɨrɨŋorɨnɨ. O imónɨŋí̵pa seyí̵ne' enɨ pí pí neróná íkwɨráí̵nánɨŋí̵ nimónɨro axí̵pɨ e'í̵rɨxɨnɨ. 16 Bɨkwí̵yo rí̵wamɨŋí̵ re nɨrɨnɨrɨ eánɨŋagɨ nánɨ rarɨŋɨnɨ, “Nionɨ sɨyikwí̵ bɨ míní̵ íkwɨráí̵nánɨŋí̵ imónɨŋáonɨ eŋagɨ nánɨ seyí̵ne' enɨ axí̵pɨ íkwɨráí̵nánɨŋí̵ imóní̵í̵rɨxɨnɨ.” nɨrɨnɨrɨ eánɨŋagɨ nánɨ “Seyí̵ne' enɨ e e'í̵rɨxɨnɨ.” rarɨŋɨnɨ.

Gorɨxo ayá tí̵ŋí̵ imónɨŋí̵pɨ tí̵nɨ gwí̵nɨŋí̵ nearoayíroŋí̵ nánɨrɨnɨ.

17 Seyí̵ne' Gorɨxomɨ —O ámáyo mí ómómɨxɨmí̵ nerí̵ná ámá xwe'rɨxa wímɨ sí̵mí̵ sí̵mí̵ e mɨŋwɨrárí̵ ayí̵ ayo wigí̵ egí̵ápimɨ dánɨ mí ómɨxaxí̵dɨní̵orɨnɨ. Omɨ xwɨyí̵á rɨrɨmí̵ nɨwirí̵ná “Ápoxɨnɨ” nurɨro nánɨ sɨnɨ xwí̵á rɨrímɨ nurí̵nɨróná omɨ wáyí̵ nɨwiro píránɨŋí̵ e'í̵rɨxɨnɨ. 18 Seyí̵ne' nɨjí̵á re imónɨŋagí̵a nánɨ rarɨŋɨnɨ. Gorɨxo segí̵ arí̵owa sɨwí̵ surí̵má seaie'kwí̵kwɨyigí̵ápɨ pí̵nɨ wiárí̵í̵rɨxɨnɨrɨ sí̵ŋá sirɨpá tí̵nɨranɨ, gorí̵ tí̵nɨranɨ, —Apɨ anɨpá imónɨpaxí̵rɨnɨ. Apɨ tí̵nɨ gwí̵nɨŋí̵ searoayíroŋí̵manɨ. 19 Negí̵ Judayí̵ wigí̵ í̵wí̵ yarɨgí̵ápɨ Gorɨxo ragí̵ pwarɨŋagɨ nɨwɨnɨrɨ yokwarɨmí̵ oneaiinɨrɨ sipɨsipí̵ miá sɨyikwí̵ mínɨŋo nɨpɨkiróná yarɨgí̵ápa o xegí̵ xewaxo Kiraiso, ragí̵ xegí̵ ayá tí̵ŋo nɨperí̵ná puŋí̵pimɨ dánɨ gwí̵nɨŋí̵ searoayíroŋí̵rɨnɨ. 20 Xwí̵árí tí̵nɨ aŋí̵na tí̵nɨ sɨnɨ mimɨxɨpa eŋáná xámɨ xegí̵ xano e e'wɨnɨgɨnɨrɨ wimónɨŋí̵pɨ tí̵nɨ xɨxenɨ nerí̵ná urí̵peaŋo seyí̵ne' arɨrá seaimɨnɨrɨ nánɨ sí̵á yoparí̵yí̵ tí̵ŋí̵ ríná rɨxa sɨŋánɨ piaumɨmí̵ ninɨrɨ seapeiŋí̵rɨnɨ. 21 Seyí̵ne' o seaiiŋí̵pimɨ dánɨ Gorɨxomɨ dɨŋí̵ wɨkwí̵roarɨgí̵árɨnɨ. O xewanɨŋo Kiraiso xwárɨpáyo dánɨ owiápí̵nɨmeanɨrɨ ámɨ dɨŋí̵ sɨxí̵ numímorɨ aga seáyɨ e'mɨ umí̵eyoaŋí̵ eŋagɨ nánɨ seyí̵ne' omɨ dɨŋí̵ nɨwɨkwí̵roro “O nearɨŋí̵pɨ nepa neaiiní̵árɨnɨ.” nɨyaiwiro dɨŋí̵ nɨwikwí̵moro ŋweaŋoɨ.

“Xɨxe dɨŋí̵ sɨxí̵ yiní̵í̵rɨxɨnɨ.” urɨŋí̵ nánɨrɨnɨ.

22 Xwioxí̵yo dánɨ nɨrɨxí̵meáyo dɨŋí̵ sɨxí̵ ouyaneyɨnɨro segí̵ í̵wí̵ yarɨgí̵ápɨ xwɨyí̵á nepaxɨŋí̵ imónɨŋí̵pimɨ arí̵á nɨwiro píránɨŋí̵ nɨxí̵dɨrɨŋí̵pimɨ dánɨ rɨxa igí̵ánɨŋí̵ eámónɨgí̵á eŋagɨ nánɨ anɨŋí̵ miní̵ xwioxí̵yo dánɨ dɨŋí̵ sɨxí̵ yiní̵í̵rɨxɨnɨ. 23 Ayí̵ rɨpɨ nánɨ “Dɨŋí̵ sɨxí̵ yiní̵í̵rɨxɨnɨ.” seararɨŋɨnɨ. Seyí̵ne' ámɨ sɨŋí̵ bí̵nɨŋí̵ eweáí̵ápɨ, ayí̵ anɨpá imónɨpaxí̵ eŋí̵pɨ marí̵áɨ, anɨŋí̵ ŋweapaxí̵ imónɨŋí̵pɨ tí̵nɨ eweáí̵árɨnɨ. Ayí̵ xwɨyí̵á Gorɨxoyá anɨŋí̵ nɨyɨmɨŋí̵ eŋí̵pɨ ámáyo ámɨ sɨŋí̵ bɨ eweaarɨŋí̵pɨ nánɨ rarɨŋɨnɨ. 24 Bɨkwí̵yo dánɨ re nɨrɨnɨrɨ eánɨŋí̵pɨ nionɨ seararɨŋápɨ tí̵nɨ xɨxenɨ imónɨŋagɨ nánɨ rarɨŋɨnɨ, “Ámá ayí̵ ayí̵ ní̵nɨ aránɨŋí̵ imónɨgí̵áyí̵rɨnɨ. Amɨpí ámá yarɨŋagí̵a nɨwɨnɨro yayí̵ umearɨgí̵ápɨ, ayí̵ ará siyí̵nɨŋí̵ imónɨnɨ. Ará yeáyí̵ nɨyɨpeárɨmáná urí̵ yarɨŋí̵pa ámá enɨ axí̵pɨ yarɨgí̵árɨnɨ. Ará siyí̵ urí̵ nerí̵ná pie'roarɨŋí̵pa amɨpí ámáyo yayí̵ umearɨgí̵ápɨ axí̵pí̵nɨŋí̵ imónarɨŋí̵rɨnɨ. E nerɨ aí Ámɨnáoyá xwɨyí̵ápɨ aga anɨŋí̵ íníná imónɨŋí̵pɨrɨnɨ.” Xwɨyí̵á e rɨnɨŋagɨ nánɨ seararɨŋɨnɨ. Xwɨyí̵á apɨ yayí̵ seainɨpaxí̵ imónɨŋí̵ wáí̵ seararɨŋwápɨrɨnɨ.